عند ام ترتر...

د.أحمد بدير
‏٢٦ أغسطس‏، الساعة ‏١٠:٠١ ص‏
عند ام ترتر...
ماحكاية ام ترتر ؟؟؟
نفوسه الشهيره ب "أم ترتر" كانت ساكنه فى احدي حوارى كرموز ومعروف عنها أنها لامؤاخذه ست لسانها طويل ومفتريه وفى فرش الملاية مالهاش مثيل...
وماشيه على مبدأ فى الحارة: 
"الشرشوحه ست جيرانها" ... 
أم ترتر مخلفتش ترتر عندها اسماعيل وابراهيم ونبويه ...
وترتر اسم شهره...
لأنها كانت عايقه بتلبس جلاليب ومناديل بترتر عشان كدا سموها أم ترتر وجوزها المعلم علوان أبو اسماعيل "عربجى حنطور "..
أم ترتر كانت ست بيت شاطرة ساكنه فى بيت دور واحد منه بيت وعربخانه لحصان وعربيه المعلم علوان والبيوت اللى حواليها دورين وثلاته 
وكانت عامله فوق السطح مزرعة فراخ وبط وكلهم "برابر " مافيش ولا ديك ولا دكر بط ...
و سايباهم سارحين ع السطح يلاغو فى ديوك ودكرة بط الجيران...
وزى ما قالوا "ومن الحب ما قتل حتى فى الفراخ والبط" ديوك الجيران كانت تنط على سطح أم ترتر عشان تكسر الفراخ والديك او دكر البط اللى ينط على سطح أم ترتر مفقود ...
وعلى طول يبقى اجدع عشوة للمعلم علوان !!! 
وكانت ام ترتر خبرة فى اخفاء اثر الديك من ريش
وخلافه...
واللى كان يضيع لها ديك وتسأل الجيران يردوا عليها بصوت واطى ...
"عند أم ترتر ربنا يعوض عليكى" ...
عشان أم ترتر لو سمعت تخلى فرده الشبشب اعلى منهم ...
مش بقولكوا كانت مفتريه كانت ريا وسكينه الفراخ ...
وطلع المثل الشعبى "عند أم ترتر" 
وهويدل على أستحاله أنك تلاقى اللى بتدور عليه رغم أنك عارف ومتأكد مين اللى خده ...!!!!